|
Brugge. Schouteet 3.709
Wje Zegher Honin ende Tydeman van den Berghe, scepenen jn Brucghe in dien tiden, doen te wetene allen den ghuenen die dese letteren zullen zien af horen, lesen dat camen voor ons alse voor scepenen, Willem filius Jans ende Kateline zijn wijf ende gauem halm ende wettelike ghifte Pietre van Roesselare ter stede bouf van Brucghe van enen huus staende in de cupe an de Speyepoorte vpter stede land van Brucghe ende Willem filius Jans ende ver Kateline zijn wijf voorseid wedden ende beloueden den voorseiden Pietre van Roesselare ter stede bouf van Brucghe voorseid dit voorseide huus staende ter voorseider stede in der manieren dat voorseid es te wetten te waerne ende te warendeerne met al datten voorseiden huus toebehoord vooren bachten an allen ziden eerduast ende nagheluast deran es ter stede bouf van Brucghe voorseid vrien eghindomme jeghen elken meinsche met viere ende viertich sceleghen parisisen huute den voorseiden huus elkes jaers gaende ten rechten landcheinse jn kennessen van desen dinghen hebben wie scepenen voorseid dese letteren huuthanghende bezeghelt met onsen zeghelen. Dit was ghedaen int jaer M CCC drie ende tachtentich vpten viertiensten dach van Nouember. |