|
Brugge. Schouteet 3.582
Wje Tideman van den Berghe, Clais van Zantuoorde, Gheraerd van den Moere, Michiel van Assenede ende Jacob van Rucelede, scepen jn Brucghe in dien tiden doen te weiten allen den ghonen die dese letteren zullen zien af horen, lesen dat wij waren tejeighenwoorden als scepenen jn ghebanre vierscare vp enen wetteliken dinghedach daer der Jacob Mommaert ende der Eueraerd Goedric verkenneden bi haren ede dat zij aldaer ghesijn hadden ende derouer gheroupen waren als scepenen vp den zeuensten dach van decembre anno domini M CCC ende tseuentich jn de Bruxsce vierscare daer Gillis van den Walle, filius sher Pieters daer wettelike deide aresteren metten Here ende metter wet onder den here Philips Rijnvissche ende den here Janne van Aertrike als tresoriers van der stede van Brucghe te dien tiden dewelke aldaer voor hoghen stonden viue ponden parisisen erueliker renten elkes jaers die Jan den Vat, filius Jacobs jaerlijx heuet vp de voorseide steide van Brucghe met honderd viere waeruen, twintich dartiene ponden ende tiene sceleghen parisisen dewelke de voorseide tresoriers aldaer kenden dat men hem tachtere es van der voorseider rente als ouer achtiene ponden groten tornoisen ywedder sculd daerof dat Gillis van den Walle voorseid, Janne den Vat wettelike ghepand heuet behouden allen rechte ende aldaer zo stond voor hoghen ende jn punte Gillis van den Walle voorseid ende toghede dat de kennesse van den voorseiden areste met hem bleiuen ware ende begherde dat men tvoorseide arreest dade ghebieden te wetten te lossene ende naer den betoghe ende begherte van Gillise van den Walle voorseid zo was aldaer tvoorseide arreest gheboden te wetten bi maninghe van den Here ende bi wijsdomme van scepenen den voorseiden Janne den Vat ouer de voorseide somme van peneghen te lossen binnen viertich daghen naest commende met vijf peneghen parisisen van ghebode af men ne verandwordets nummerme behouden allen rechte jn kennessen van desen dinghen hebben wij scepenen voorseid dese letteren huuthanghende beseghelt met onsen zeglen. Dit was ghedaen jnt jaer M CCC ende tseuentich vp den neghentiensten dach van Decembre. |
|
Brugge. Schouteet 3.585 Wje Tideman van den Berghe, Jan de Rode, Jacob van Berneem, Jan Walkier ende Jacob van Ruusselede, scepenen jn Brucghe in dien tiden, doen te weitene allen den ghuenen die dese letteren zullen zien af horen, lesen dat cam voor ons als voor scepenen, joncvrauwe Jehane Bertelmeeus weduwe van den Walle, filius sher Gillis, filius sher Bertelmeeus ende gaf vp ende drouch jn handen den here Philpse Rijnvisch ende den here Janne van Aertrike als tresoriers van der stede van Brucghe te dien tiden ter voorseider steide bouf al de zelue macht ende rechte die zoe hadde af hebben mochte an desen eersten chaertere ende an al dies hi verclaerst ende jnhoud duere denwelken dese laetste jeighenwoordighe chaertere anhanghet ende ghesteiken es ende joncvrauwe Jehane Bertelmeeus weduwe van den Walle voorseid wedde ende belouede den voorseiden tresoriers ter voorseider steide bouf dese voorseide macht ende recht van den voorseiden eersten chaertere1 te wetten te waerne ende te warandeirne ter voorseider steide vryen eghindomme jeighen elken mensche jn kennessen van desen dinghen hebben wij scepenen voorseid dese letteren huuthanghende beseghelt met onsen zeiglen. Dit was ghedaen jnt jaer M CCC ende tseuentich vp den dartichsten dach van Sporkele. |